العوانس تانى

طبعا اكيد عرفتوا انا بتكلم ليه كتير على العوانس ....
المهم اكتشفت ان الناس بتبص للعانس على انها اتنين ما فيش غيرهم يا واحدة عايزة تصطاد عريس و خلاص وده معناه انها اى حد تتكلم معاه او تقف معاه او تهزر معاه يبقى طبعا هو الصيدة بتاعها ... و يا اما انها على علاقة سرية باى حد و مخبية "عرفى يعنى" وده الاعتقاد الاغلب مش متصورين ان العوانس مش فى ايدهم حاجة و مسلمين امرهم لله و فى النهاية ده نصيب زى الصحة و الفلوس و اى حاجة تانية ...احنا تقريبا محددين انواع معينة من قلة الرزق هى بس اللى مقبولة زى المرض ..عدم الخلفة... الفقر ..لكن عدم الجواز لا ده مش وارد يحصل ..يعنى اى عانس لازم تكون هى السبب فى قعدتها دى ...

الاجازة

النهاردة انا اجازة.. و خدت بالى انى مش عندى حاجة اعملها .....خالص مع انى طول الاسبوع بشتكى من الشغل و الصحيان بدرى .. لكن اهه لما جت الاجازة مش عارفة اعمل ايه فيها

حاجة غريبة ...يعنى احنا نفضل نشتكى من حاجة معينة و لما تجيلنا الفرصة نحلها ما نعملش اى حاجة..... يظهر الهدف الشكوى و خلاص

وده بيحصل فى حياتنا كتير قوى ...يعنى اوضاع و اشخاص متضايقين منهم بس مش بنعمل حاجة بنتفرج على نفسنا و احنا بنتخنق واحدة واحدة ... يظهر دى السادية اللى بيقولوا عليها انك تشوف نفسك بتتعذب و ما تحاولش تدافع عن نفسك
"اللهم انى اعوذ بك من العجز و الكسل"

نرجع لموضوع الاجازة ..تفتكروا احنا شعب ما بيعرفش يفرح ؟؟
يعنى ما عندناش خبرة ازاى نفرح نفسنا ..بالعكس احنا اساتذة فى النكد طبعا مش كل الناس بس اغلبهم و انا اولهم ...يا ترى الواحد ممكن يدرب نفسه على الفرح ..لو حد يقدر يساعد ؟؟

"تيجى نرقص"

انا دخلت الفيلم ده النهاردة ....هو حلو قوى و فكرته جميلة و اظن اننا محتاجينها كمصريين لينا نمط حياة ممل قوى و ناحية الترفيه و التغيير عندنا مهملة تماما.

الفيلم ركز قوى على اد ايه الملل و عدم التغيير بيغير مشاعر الناس ناحية بعض ...يعنى اللى بتحبه ممكن فى وقت تانى و انت زهقان و محبط تلاقى نفسك زهقان منه و مش طايقه

و بين اد ايه اننا لازم نحاول نفهم بعض و نعزر بعض و نحط تحت نعزر دى الف خط .....

يعنى ممكن راجل يعزر مراته لو اتصرفت تصرف مش ولابد و هى تحت تاثير حالة ملل او زهق ....هل فيه الراجل ده ...طبعا لحد معين مش اى حاجة تتعدى بس المهم الواحد يلاقى حد يبقى متفاهم فى اوقات زى دى ....اقصد اوقات الاحباط و الاحساس بالفشل فى كل حاجة ...احساس فظيع قوى و خطير قوى ... لو الواحد ما خرجش منه بسرغة ممكن يودى للانتحار .

الحاجة اللى ما عجبتنيش فى الفيلم محاولة فرض وجود الشواذ و اعتبارهم شىء مسلم بيه ......

انا مش بنكر وجودهم بس مجرد وجود حاجة ده مش معناه قبولها ....احنا مش لسه هنقول الشواذ حلال ولا حرام ... المهم اننا نفضل مستنكرين وجودهم .. على الاقل من باب من راى منكم منكرا ............

لكن اننا نوصل لمرحلة اننا حتى استنكار الغلط لا يبقى ربنا يستر علينا و يخرجنا من الدنيا دى على خير

العوانس

انا سميت البلوج كده لانى ناوية اتكلم فى اى حاجة فى اى حاجة تخطر على بالى او تقابلنى فى الدنيا دى بس مش عارفة ابتدى بايه
ممكن ابتدى بموضوع بيلح عليا اليومين دول و عايزة ابعت للصحفيين و اللى بيقدموا برامج علشان يتكلموا فيه

هو موضوع محرج شوية و بايخ شوية ......انا فكرت ابعت لهالة سرحان تتكلم فيه لانها جريءة و هتتكلم فى كل النقط اللى تخص الموضوع مش هتقول كلام فض مجالس و خلاص ...هو بخصوص العوانس ... اه العوانس .. و اللى بيقابلوه فى حياتهم من مواقف من الناس اللى حواليهم على اختلاف نواياهم الوضوع تفاصيله كتير قوى هحاول ارتب افكارى و اتكلم فى نقطة نقطة ان شاء الله