Saturday, May 10, 2008

الوان السما السبعة





الحقيقة الفيلم من افلام التأمل الى تخليك تفكر فى حياتك و الناس الى حواليك و الدنيا كلها و ربنا و الاخرة ...يعنى ...فيلم يخليك تقف و تشوف ايه الى بيحصل .
فكرة الفيلم الاساسية هى التسامح و البدء من جديد بالرغم من اى شىء و كل شىء.
و التجرد من مشاعر الكراهية لاى شىء ..يعنى حالة حب لكل الوجود و كل الناس بالرغم من كل اخطاءهم ..
بس هل فعلا ممكن الناس تغفر لبعض للدرجة دى ؟
معلش انا نسيت احكى الفيلم ..الفيلم باختصار ..ليلى علوى بنت اسرة فقيرة و خدتها تاجرة شنطة .."ده النشاط الظاهر" ده النشاط الظاهر لكن هى قوادة و شغلتها بفلوس ...و فضلت طول فترة شبابها على الحال ده من واحد للتانى و عيلتها فاكرة انها بتاجر ..و تقريبا هما عارفين بس مطنشين ..المهم مرت السنين و ابتدت تقرف من حياتها فقررت توقف نشاطها ..و كانت فى رمضان بتحضر عروض التنورة الى فى الاحياء الاثرية فى الحسين و هنالك شافت فاروق و اتعرفت عليه و حصل بينهم تقارب انسانى سريع جدا و ارتياح من الطرفين لدرجة انها حكتلوا على حقيقة شغلها ....و اما فاروق فهو راقص تنورة مشهور قوى و مطلق من سوسن بدر و عنده ابن وحيد و سبب طلاقة منها انها " مايصة" اه و الله يعنى طريقة كلامها مع الناس مش بتعجبه و راقبها كتير و ما مسكش عليها حاجة لكن الشك قلب حياته فقرر يريح نفسه و يطلقها ...المهم ابنه كبر و خطب بنت من الحارة بتاعته و تطلع البنت دى بتخونه برضه "مش عارفة ليه؟" المهم بكر "فاروق الفيشاوى" بيتصدم من اعتراف حنان"ليلى علوى" و بيظهر فى مشهد بعد عرض من عروض التنورة ..إحدى المتفرجات تنتظره فى الخارج و يظهر لنا انه هو الاخر على علاقة بسيدات كثيرات و بمقابل ايضا !!!!!و فى هذه الليلة نجده يرد لهذه السيدة هداياها بما معناه انه هو الاخر قرر التوقف عن هذه الحياة القذرة
و فى زيارة لحنان يعترف لها بذلك و يحدث بينهم تقارب انسانى و جسدى فى هذا اليوم و يطلبها للزواج ..و كانت حنان طول الوقت تتردد على السفارات لمحاولة الحصول على تأشيرة هجرة لاى دولة ..غالبا للهروب من ماضيها و الناس التى تعرفها ..و فقط عند طلب بكر لها للزواج تاتيها موافقة سفارة استراليا بالموافقة ...طبعا لتصعيب الاختيار بين الزواج من بكر و السفر ...لكنها تختار الزواج من بكر لانه فرصتها فى البدء من جديد فى نفس محيطها بدون هروب
الفيلم يجعلك تفكر لاى مدى تتقبل الناس اخطاء بعضها و لاى مدى تتسامح ولاى مدى تنسى
....

Friday, February 9, 2007

السجادة

مش عارفة ليه النهاردة وانا بنضف السجادة سالت نفسى يا ترى السجادة احساسها ايه و احنا بندوس عليها ..طبعا سوال غريب قوى بس لما فكرت لقيت ان حتى السجاد مش زى بعضه......... يعنى فيه سجاد مرفه و سجاد بيطلع عين ابوه .........
اه و الله مش فى سجاد بنعلقه على الحيطة و سجاد اصحابه بيودوه للتنظيف بالبخار و حاجة اخر دلع..
و سجاد تانى يا عينى طالع عين امه محطوط فى حتة وسخة و بيترمى عليه كل انواع القذارة اللى فى الدنيا و عمره مايشوف الشمس ولا المياة و الصابون .... يعنى حتى السجاد فيه مستويات .....الدنيا كلها و الحاجات كلها و الحيوانات كلها ز الطيور كلها .."انما امم امثالكم".......
معلش يظهر مش لاقية بنى ادمين اتواصل معاهم فاتواصلت مع السجادة

Sunday, January 21, 2007

وقت ضايع

حد خد باله احنا بناخد وقت اد ايه علشان نفهم بعض ده اذا حصل و فهمنا بعض من اصله....
الامر مش موضوع لغة ده طلع حاجة تانية خالص ...هى ايه ما اعرفش .. ايه هى الحاجة اللى تخليك تفهم حد و حد لا ...
حد تفهمه من غير ما يتكلم و حد مهما اتكلم على طول فيه سوء تفاهم بينك و بينه ...يظهر موضوع ارواح فعلا ....
و لما ربنا يكرمك و تفهم... مين عارف هتلاقيه موجود ولا لا
المهم لما بنفهم صح ..يا ترى بنحاول نصلح حاجة او نعتذر او نوضح ...غالبا لا ..كبر ...او لا مبالاة ... الله اعلم ...تقريبا احنا مبسوطين اننا مش فاهمين بعض و مطنشين ..
يا عم كبر.....

Sunday, December 3, 2006

العوانس تانى

طبعا اكيد عرفتوا انا بتكلم ليه كتير على العوانس ....
المهم اكتشفت ان الناس بتبص للعانس على انها اتنين ما فيش غيرهم يا واحدة عايزة تصطاد عريس و خلاص وده معناه انها اى حد تتكلم معاه او تقف معاه او تهزر معاه يبقى طبعا هو الصيدة بتاعها ... و يا اما انها على علاقة سرية باى حد و مخبية "عرفى يعنى" وده الاعتقاد الاغلب مش متصورين ان العوانس مش فى ايدهم حاجة و مسلمين امرهم لله و فى النهاية ده نصيب زى الصحة و الفلوس و اى حاجة تانية ...احنا تقريبا محددين انواع معينة من قلة الرزق هى بس اللى مقبولة زى المرض ..عدم الخلفة... الفقر ..لكن عدم الجواز لا ده مش وارد يحصل ..يعنى اى عانس لازم تكون هى السبب فى قعدتها دى
...

Saturday, December 2, 2006

الاجازة

النهاردة انا اجازة.. و خدت بالى انى مش عندى حاجة اعملها .....خالص مع انى طول الاسبوع بشتكى من الشغل و الصحيان بدرى .. لكن اهه لما جت الاجازة مش عارفة اعمل ايه فيها

حاجة غريبة ...يعنى احنا نفضل نشتكى من حاجة معينة و لما تجيلنا الفرصة نحلها ما نعملش اى حاجة..... يظهر الهدف الشكوى و خلاص

وده بيحصل فى حياتنا كتير قوى ...يعنى اوضاع و اشخاص متضايقين منهم بس مش بنعمل حاجة بنتفرج على نفسنا و احنا بنتخنق واحدة واحدة ... يظهر دى السادية اللى بيقولوا عليها انك تشوف نفسك بتتعذب و ما تحاولش تدافع عن نفسك
"اللهم انى اعوذ بك من العجز و الكسل"

نرجع لموضوع الاجازة ..تفتكروا احنا شعب ما بيعرفش يفرح ؟؟
يعنى ما عندناش خبرة ازاى نفرح نفسنا ..بالعكس احنا اساتذة فى النكد طبعا مش كل الناس بس اغلبهم و انا اولهم ...يا ترى الواحد ممكن يدرب نفسه على الفرح ..لو حد يقدر يساعد ؟؟

Tuesday, November 28, 2006

"تيجى نرقص"

انا دخلت الفيلم ده النهاردة ....هو حلو قوى و فكرته جميلة و اظن اننا محتاجينها كمصريين لينا نمط حياة ممل قوى و ناحية الترفيه و التغيير عندنا مهملة تماما.
الفيلم ركز قوى على اد ايه الملل و عدم التغيير بيغير مشاعر الناس ناحية بعض ...يعنى اللى بتحبه ممكن فى وقت تانى و انت زهقان و محبط تلاقى نفسك زهقان منه و مش طايقه
و بين اد ايه اننا لازم نحاول نفهم بعض و نعزر بعض و نحط تحت نعزر دى الف خط .....
يعنى ممكن راجل يعزر مراته لو اتصرفت تصرف مش ولابد و هى تحت تاثير حالة ملل او زهق ....هل فيه الراجل ده ...طبعا لحد معين مش اى حاجة تتعدى بس المهم الواحد يلاقى حد يبقى متفاهم فى اوقات زى دى ....اقصد اوقات الاحباط و الاحساس بالفشل فى كل حاجة ...احساس فظيع قوى و خطير قوى ... لو الواحد ما خرجش منه بسرغة ممكن يودى للانتحار .
الحاجة اللى ما عجبتنيش فى الفيلم محاولة فرض وجود الشواذ و اعتبارهم شىء مسلم بيه ......
انا مش بنكر وجودهم بس مجرد وجود حاجة ده مش معناه قبولها ....احنا مش لسه هنقول الشواذ حلال ولا حرام ... المهم اننا نفضل مستنكرين وجودهم .. على الاقل من باب من راى منكم منكرا ............
لكن اننا نوصل لمرحلة اننا حتى استنكار الغلط لا يبقى ربنا يستر علينا و يخرجنا من الدنيا دى على خير

Saturday, November 18, 2006

العوانس

انا سميت البلوج كده لانى ناوية اتكلم فى اى حاجة فى اى حاجة تخطر على بالى او تقابلنى فى الدنيا دى بس مش عارفة ابتدى بايه
ممكن ابتدى بموضوع بيلح عليا اليومين دول و عايزة ابعت للصحفيين و اللى بيقدموا برامج علشان يتكلموا فيه

هو موضوع محرج شوية و بايخ شوية ......انا فكرت ابعت لهالة سرحان تتكلم فيه لانها جريءة و هتتكلم فى كل النقط اللى تخص الموضوع مش هتقول كلام فض مجالس و خلاص ...هو بخصوص العوانس ... اه العوانس .. و اللى بيقابلوه فى حياتهم من مواقف من الناس اللى حواليهم على اختلاف نواياهم الوضوع تفاصيله كتير قوى هحاول ارتب افكارى و اتكلم فى نقطة نقطة ان شاء الله